Ministria e Infrastrukturës dhe e Transportit njoftoi se të enjten (30 korrik) do të ketë kufizim të përkohshëm të qarkullimit për automjetet me mbi 20 tonë.
Vendimi u mor, siç thuhet në njoftim, bazuar në parashikimin zyrtar të temperaturave për të enjten.
“Në autoudhë kufizimi do të jetë në fuqi nga ora 11:00 deri në 17:30, pasi temperatura e parashikuar plotëson kushtin prej 32°C ose më shumë.
Në rrugët nacionale, rajonale dhe lidhëse qarkullimi lejohet pa kufizime.
Nga kufizimi përjashtohen automjetet e organeve të rendit dhe sigurisë publike, shërbimeve emergjente dhe institucioneve shëndetësore. Lusim operatorët dhe ngasësit që të respektojnë kufizimin dhe të planifikojnë qarkullimin në përputhje me orarin e përcaktuar”, thuhet në njoftim.
