Franca dhe Spanja po vazhdojnë të luftojnë me zjarret e mëdha të martën, ndërsa temperaturat e larta, lagështia e ulët dhe erërat e ndryshueshme rrezikojnë përkeqësimin e situatës.
Në Francën jugperëndimore, megazjarri i Girondës mbeti i stabilizuar, por i pakontrolluar, pasi ka djegur 42,000 hektarë që nga 22 korriku.
Prefektja e Girondës, Sophie Brocas, paralajmëroi se situata mbeti “shumë e paparashikueshme”.
Autoritetet franceze urdhëruan evakuimin e gati 4,000 personave të martën nga vendet turistike në bregdetin e Atlantikut, raporton AP.
Rreth 2,750 zjarrfikës, 1,500 ushtarakë, 1,440 anëtarë të forcave të sigurisë dhe 18 avionë u angazhuan për shuarjen e flakëve.
Nënkoloneli Olivier Cravata tha se ekipet po punonin për të siguruar perimetrin e zjarrit, duke shtuar: “Kemi 130 kilometra (81 milje) për të bërë”.
Shtatë departamente franceze u vunë në alarm portokalli për rrezik të lartë zjarresh. Një zjarrfikës vullnetar humbi jetën në Bouches-du-Rhone, ndërsa katër të tjerë u plagosën lehtë në Var.
Kurse në Spanjë, zjarrfikësit u përballën me kushte kritike përpara valës së katërt të të nxehtit. Zjarret kanë djegur rreth 172,400 hektarë këtë vit, ndërsa më shumë se 180,000 njerëz mbeten të evakuuar ose të izoluar, shkruan Anadolu
Ministri i Brendshëm Fernando Grande-Marlaska e përshkroi zjarrin në Avila si “zjarri më domethënës dhe më agresiv në historinë e Spanjës”.
Mbi 400 punonjës të emergjencës punuan gjatë natës për të frenuar zjarrin në Valdemaqueda, ndërsa temperaturat pritej të arrinin deri në 40 gradë Celsius në disa zona.
Zjarret në Francë dhe Spanjë kanë detyruar rreth 330,000 njerëz të evakuohen, ndërsa Spanja hyri në valën e katërt të të nxehtit të verës me disa zjarre ende jashtë kontrollit, përfshirë më të madhin e regjistruar ndonjëherë.
