Prokuroria Themelore në Prishtinë ka njoftuar se ka ndaluar një person të dyshuar për veprat penale “Keqpërdorimi i pozitës apo autoritetit zyrtar” dhe “Falsifikimi i dokumentit zyrtar”.
Sipas Prokurorisë, hetimet kanë të bëjnë me dyshimet për tejkalim të kompetencave dhe lëshim të lejeve për disa operatorë ekonomikë për importin e produkteve biocide dhe pesticideve, të cilat dyshohet se janë të ndaluara për përdorim në Republikën e Kosovës, sipas listës së Agjencisë Evropiane të Kimikateve (ECHA) të Bashkimit Evropian.
Arrestimi i të dyshuarit është kryer nga Policia e Kosovës, ndërsa me urdhër të Prokurorit të Shtetit, personi është ndaluar për 48 orë.
Prokuroria Themelore në Prishtinë ka bërë të ditur se në bashkëpunim me Policinë e Kosovës dhe institucionet tjera kompetente do të vazhdojë ndërmarrjen e veprimeve hetimore për zbardhjen e plotë të rastit./teve1.info/
