Në Shushicë të Istogut, dy persona kanë humbur jetën, ndërsa tre të tjerë kanë pësuar lëndime si pasojë e aksidentit të trafikut që ndodhi sot rreth orës 15:20.
Spitali i Përgjithshëm në Pejë bën të ditur se rreth orës 16:00, në Shërbimin e Emergjencës është pranuar një paciente pa shenja jete.
Sipas spitalit, viktima kishte pësuar politraumë dhe, pavarësisht procedurave të ndërmarra nga ekipi mjekësor, është konstatuar pa shenja jete.
Rreth 30 minuta më vonë, në spital janë pranuar edhe katër persona të lënduar nga i njëjti aksident.
Një fëmijë është transferuar në Qendrën Klinike Universitare të Kosovës (QKUK), i intubuar dhe nën përcjelljen e ekipit të Anestezionit, për trajtim të mëtejshëm. Ai ka pësuar politraumë, hemorragji intrakraniale dhe frakturë të femurit.
Një paciente tjetër është hospitalizuar në Repartin e Ortopedisë me frakturë të femurit.
Ndërkaq, dy të lënduar të tjerë, pas ekzaminimeve dhe trajtimit mjekësor, janë liruar për trajtim ambulantor, pasi kanë pësuar lëndime të lehta trupore.
Spitali i Përgjithshëm në Pejë u ka shprehur ngushëllime familjarëve të viktimës, ndërsa të lënduarve u ka uruar shërim sa më të shpejtë.
Gjatë ditës, KosovaPress raportoi se një aksident i tragjik ka ndodhur pasditen sot pasdite në Istog, përkatsisht në fshatin Shushicë, ku si pasojë dy persona kanë humbur jetën, ndërsa tre të tjerë kanë mbetur të lënduar nga ky aksident trafiku, raporton KosovaPress.
Lajmin për KosovaPress e ka konfirmuar zëdhënësi i Policisë për rajonin e Pejës, Fadil Gashi, i cili bën të ditur se aksidenti ka ndodhur rreth orës 15:20, ku ishin të përfshira dy vetura.
