Për shtatë ditë me radhë u mbulua nga tymi.
Është kjo deponia e mbeturinave në Sferkë të Pejës e cila po po vazhdon të digjet.
E kjo gjendje, nxori në rrugë për të protestuar të hënën banorët e Sferkës.
Sipas tyre, ajri i ndotur ua ka vështirësuar jetën.
“Jeni duke e parë vetë timin që që tash në këtë moment, jeni duke e parë, vija ajrore është 50 metra mbi shtëpitë tona. As dritare, as në oborr me dalë se jo më larg, më gjerë”, ka thënë një qytetar.
Banorët thonë se problemi me deponinë po vazhdon prej vitesh.
“Tymi po na ka shkaktuar dëm shumë të madh, na tërë po e shihni. S’mundemi me qelë dritare, as s’mundemi me qelë kurgjo hiç prej ere. A kjo është ilegale. Kjo veç për pesë vjet ka qenë e planifikuar. Që 15 vjet kjo është ilegale”, u shpreh qytetari tjetër.
Këta banorë thonë se përgjegjesine institucionet po ia hedhin njëra-tjetrës.
“E tash përpos këtij tymi, pra, kjo deponi e rrjedh një lëng, një ujë, qoftë nga të reshurat atmosferike, qoftë që e zbrazin ata ujin aty për me me zbut atë, mos me lëju me u bë ndezja e tyre, sepse ato mund të ndizen edhe vetë vetvetiu, po edhe mundet dora e njeriut me i ndez. Ai ujë rrjedh. Rrjedh dhe ajo paraqet problem për kafshët, po edhe për të gjitha prodhimet bujqësore, sepse ajo depërton në tokë, helmohen, pra, qofshin kafshët, qofshin uh prodhimet bujqësore”, ka theksuar nje qytetar tjetër.
E i pari i Pejës, Gazmend Muhaxheri, thotë se komuna ka ndarë 3 milionë euro për mbylljen e kësaj deponie.
Krejt kjo, pasi me Ministrinë e Infrastruktuës dhe Planifikimit Hapësinor, nuk gjetën një gjuhë të përbashkët.
“Ne si komunë jemi munduar me bërë shpronësimin e pronës ku është e ndërtuar deponia ekzistuese. Nuk na është lejuar me bërë shpronësimin edhe me marrëveshjen që e kemi bërë me Bashkimin Evropian për mbylljen e kësaj deponie dhe hapjen e deponisë së re, ku ka qenë Ministria e Infrastrukturës dhe Planifikimit Hapësinor me ministrin Liburn Aliu. Komuna e Pejës, pasi që ministria s’ka marrë obligim me ndarë buxhet për mbylljen e kësaj deponie, komuna e Pejës si vend ku ndodhet deponia dhe e interesuar për t’u ndihmuar edhe banorëve edhe me heq këtë problem, kemi ndarë 3 milionë euro për mbylljen e kësaj deponie.Deponia në Pejë ka 1 vjetë e dicka që është shpronësu prej qeverisë, dhe është pronë e qeverisë e cila i jepet nën menaxhim KMDK”, u shpreh Muhaxheri.
E për zjarret në këtë deponi, thonë se është iniciuar rasti nga Prokuroria Themelore në Pejë.
“Prokurori i Shtetit ka autorizuar ekspertin e zjarreve që të dalë në vendin e ngjarjes dhe të konstatojë shkaqet e zjarrvënies dhe mbi të gjeturat të cilat do të deponohen në Prokurorinë Themelore në Pejë, do të merren veprime të caktuara ligjore. Eventualisht, nëse ka përgjegjësi penale, gjithmonë në koordinim me Policinë e Kosovës, do të ndërmerren veprime hetimore në drejtim të personit apo personave të cilët eventualisht mund ta kenë shkaktuar zjarrvënien”, ka thënë Nikçi.
Ndryshe, protestuesit thonë se do t’i vazhdojnë protestat deri në zgjidhjen e problemit.
