Ish-presidentja e Kosovës, Atifete Jahjaga, ka marrë pjesë në përurimin e muralit “Çast” në Gjakovë, një vepër artistike e realizuar në kuadër të nismës “Lulëkuqja e Çastit”, e cila synon të nderojë të mbijetuarit e dhunës seksuale gjatë luftës në Kosovë.
Ceremonia u mbajt pranë lumit Krena, në prani të kryetarit të Gjakovës, Ardian Gjini, ambasadorit të Mbretërisë së Bashkuar në Kosovë, Jonathan Hargreaves, drejtoreshës së UN Women në Kosovë, Vlora Tuzi-Nushi, drejtoreshës së Medica Gjakova, Mirlinda Sada, si dhe aktivisteve e qytetarëve.
Përmes një postimi, Jahjaga tha se me këtë përurim në Gjakovë u shënua një moment kujtese, nderimi dhe reflektimi për vuajtjet e së kaluarës, nga të cilat, sipas saj, burojnë rrënjët e historisë së re të Kosovës.
Ajo falënderoi kryetarin e Komunës së Gjakovës për bashkëpunimin, artisten Mimoza për realizimin e muralit, si dhe të gjithë ata që morën pjesë në këtë ngjarje për të nderuar të mbijetuarit.
Murali “Çast” është pjesë e angazhimit të Fondacionit Jahjaga për ruajtjen e kujtesës kolektive dhe rritjen e ndërgjegjësimit për të mbijetuarit e dhunës seksuale gjatë luftës në Kosovë./teve1.info/
