Në shënim të pesëvjetorit të aksidentit tragjik të autobusit në Kroaci, në qytetin e Slavonski Brod do të vendoset një pllakë përkujtimore në nderim të 10 qytetarëve të Kosovës që humbën jetën.
Sipas njoftimit të Ambasadës së Republikës së Kosovës në Kroaci, ceremonia përkujtimore do të mbahet më 23 korrik, duke filluar nga ora 10:30.
Në këtë aktivitet pritet të marrin pjesë përfaqësues të Ministrisë së Punëve të Brendshme të Kosovës, autoritetet lokale të Slavonski Brod-it, përfaqësues të Prefekturës Brod-Posavinë, si dhe përfaqësues të Ambasadës së Kosovës në Kroaci.
Pllaka përkujtimore do të vendoset në kujtim të viktimave të aksidentit të 25 korrikut 2021, kur një autobus që po udhëtonte nga Frankfurti drejt Kosovës doli nga rruga në afërsi të Slavonski Brod-it.
Nga aksidenti humbën jetën 10 persona, ndërsa mbi 30 të tjerë mbetën të lënduar. Në autobus udhëtonin rreth 60 pasagjerë.
Pas ngjarjes, autoritetet kroate arrestuan shoferin e autobusit të kompanisë “Deva Tours”, i cili deklaroi se e kishte zënë gjumi në momentin kur ndodhi aksidenti./teve1.info/
