Politologu, Albinot Maloku e ka vlerësuar si të mirë, ftesën që kryeministri në detyrë dhe kryetari i LVV-së, Albin Kurti ua ka bërë partive opozitare shqiptare për formimin e institucioneve.
Ai ka thënë se Kurti ka filluar ta kuptojë se vendi ka nevojë për kompromis.
Por, sipas tij, problemi është që Kurti për gjashtë vjet në pushtet nuk ka kontribuar që të ketë partnerë kur i duhen.
“Çka është një problem se për këto 6 vite nuk i ka kontribuua mundësisë së pasjes së një kompromisi në ditë të vështira, pra ka mendua se gjithmonë do të jetë në lule.. Pra në momentin e kthesës që qytetari ta jep, e që njeriu duhet me kontribuua maksimalisht për ketë momentin kthesës, sot do ta kishte shumë më shumë alternativa. Jo një LDK të traumatizuar, një PDK që kalon në faza të zgjedhjeve të brendshme dhe Aleancën që ka treguar kreativitet”, ka thënë Maloku në emisionin “Këndi i Debatit”, në Tëvë1.
Kurti pas certifikimit të rezultatit të zgjedhjeve të 7 qershorit, ka ftuar në takim krerët e PDK-së, LDK-së e Aleancës
PDK e LDK ju përgjigjen pozitivisht, ndërsa Aleanca refuzoi takimin, duke kërkuar që gjashtë pikat e tyre të pranohen nga Kurti që t’i bënin kuorumin për president.
