Një mosmarrëveshje mes dy vëllezërve lidhur me bizneset e tyre ka përfunduar me arrestimin e një 34-vjeçari dhe sekuestrimin e armëve në Ferizaj.
Sipas Policisë së Kosovës, rasti është raportuar më 15 korrik, rreth orës 16:30, në nënstacionin policor në Reçan të Prizrenit.
Ankuesi ka deklaruar se ishte kanosur nga vëllai i tij pas një mosmarrëveshjeje që lidhej me bizneset e tyre.
Pas konsultimit me prokurorin kujdestar të Departamentit të Përgjithshëm, hetuesit e Sektorit të Hetimeve të Stacionit Policor në Prizren kanë kryer kontrolle në dy prona të të dyshuarit, një banesë në Ferizaj dhe një shtëpi në fshatin Koshare.
Gjatë bastisjeve, policia ka sekuestruar një pushkë gjuetie, 31 fishekë të pushkës së gjahut, një karikator të zbrazur dhe një pushkë ajrore të dëmtuar pa shënime identifikuese.
Me urdhër të prokurorit, ndaj të dyshuarit B. Sh është caktuar masa e ndalimit për 48 orë.
Ndaj tij është iniciuar procedurë penale për veprat “Kanosja” dhe “Mbajtje në pronësi, kontroll ose posedim të paautorizuar të armëve”./teve1.info/
