Policia e Kosovës ka njoftuar se ka sekuestruar 147.7 gramë substancë të dyshuar narkotike të llojit kokainë gjatë një aksioni të zhvilluar nga hetuesit e Drejtorisë për Hetimin e Trafikimit me Narkotikë (DHTN) në rajonin e Prishtinës.
Sipas njoftimit, hetuesit kishin pranuar informacione se një person dyshohej se merrej me shitblerje të substancave narkotike. Pas veprimeve operative dhe hetimore, më 15 korrik 2026 është lokalizuar i dyshuari me inicialet F. P. (1992) në magjistralen Pejë–Prishtinë, teksa ndodhej në një veturë.
“Hetuesit policorë nga Njësia e Drejtorisë për Hetimin e Trafikimit me Narkotikë (DHTN), Prishtinë, kanë trajtuar një rast rreth dyshimit se një i dyshuar është duke u marrë me shitblerje të substancave narkotike. Pas një pune operative-hetimore, më 15.07.2026, në magjistralen Pejë–Prishtinë, është lokalizuar i dyshuari F. P. (1992), i cili ishte në një veturë”, thuhet në njoftimin e Policisë.
Policia bëri të ditur se gjatë kontrollit të veturës dhe bastisjes së shtëpisë së të dyshuarit janë gjetur dhe konfiskuar 147.7 gramë substancë që dyshohet të jetë kokainë, si dhe prova të tjera që lidhen me rastin.
“Në veturë dhe në shtëpinë e të dyshuarit janë gjetur dhe janë konfiskuar 147.7 gramë substancë që dyshohet të jetë narkotike e llojit kokainë dhe dëshmi tjera relevante lidhur me rastin. Rasti është trajtuar në koordinim me prokurorin kujdestar”, thuhet më tej në njoftim.
Gjatë aksionit është bastisur edhe shtëpia e një personi tjetër, me inicialet Q. K. (1993), mirëpo, sipas Policisë, aty nuk është gjetur asnjë send i ndaluar.
Ndaj të dy të dyshuarve është iniciuar rasti për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
“Të dyshuarit, me aktvendim të prokurorit, janë dërguar në mbajtje për 48 orë”, ka njoftuar Policia e Kosovës.
