Agjencia e Ushqimit dhe Veterinarisë ka njoftuar se ka ndërmarrë kontrolle zyrtare emergjente në Han të Elezit, pas raportimeve për dyshime se dhjetëra qytetarë janë helmuar nga ushqimi i konsumuar në një lokal fast-food.
Sipas AUV-së, inspektorët veterinarë kanë dalë menjëherë në terren, ku kanë kryer inspektime të jashtëzakonshme për të mbështetur institucionet kompetente në identifikimin e shkaktarit të mundshëm dhe mbrojtjen e shëndetit publik.
“Në të dy lokacionet, inspektorët veterinarë të AUV-së kanë zhvilluar inspektime të jashtëzakonshme, gjatë të cilave janë kontrolluar kushtet higjieno-sanitare, procedurat e vetëkontrollit të operatorëve, dokumentacioni përkatës, gjurmueshmëria e produkteve dhe lëndëve të para, si dhe janë marrë mostra zyrtare për analiza laboratorike mikrobiologjike”, thuhet në njoftimin e AUV-së.
Për rastin në Han të Elezit, Agjencia ka bërë të ditur se është marrë mostër e majonezës nga objekti ku dyshohet se ndodhi helmimi.
“Në Han të Elezit është marrë mostër e majonezës nga objekti i shërbimit. Mostrat janë dërguar në Laboratorin e Ushqimit dhe Veterinarisë për analiza laboratorike”, thuhet në komunikatë.
AUV ka bërë të ditur se analizat laboratorike janë ende në proces dhe se rezultatet do të përcaktojnë nëse ekziston lidhje mes ushqimit të konsumuar dhe rasteve të raportuara.
“Pas përfundimit të analizave laboratorike dhe vlerësimit të të gjitha provave të mbledhura gjatë kontrollit zyrtar, AUV do të përpilojë raportin përfundimtar dhe do të njoftojë publikun për rezultatet. Nëse konstatohen shkelje të legjislacionit në fuqi ose rrezik për shëndetin publik, do të ndërmerren pa vonesë masat administrative dhe ligjore ndaj operatorëve përgjegjës”, theksohet në njoftim.
Agjencia rikujtoi se siguria ushqimore është përgjegjësi e operatorëve të bizneseve ushqimore, të cilët janë të obliguar të respektojnë standardet ligjore për prodhimin, ruajtjen dhe tregtimin e produkteve ushqimore.
Po ashtu, AUV u bëri thirrje qytetarëve që gjatë blerjes së produkteve ushqimore të kontrollojnë etiketimin, afatin e përdorimit dhe kushtet e ruajtjes, ndërsa njoftoi se kontrollet e intensifikuara do të vazhdojnë në të gjithë territorin e Kosovës.
