Të dielën ishte e ftuar në një emision televiziv serb.
E ajo që e deklaroi këtu Ministrja e Administratës Publike në Serbi, Snezhana Paunoviq, e tronditi opinionin.
Kjo e fundit tha po të kishte lirinë e veprimit të Slobodan Millosheviq, do t’a kishte spastruar etnikisht Kosovën gjatë vitit 1998-99.
Ky deklarim i ministres së lindur në Pejë, nxiti reagime të shumta.
Të martën zëdhënësja e Bashkimit Evropian, Anittta Hipper, tha se në Evropë, nuk ka vend në për retorikë që e promovon spastrimin etnik.
“Deklarata të tilla bien ndesh me vlerat e dinjitetit njerëzor, pajtimit, llogaridhënies dhe fqinjësisë së mirë, mbi të cilat është themeluar BE-ja. Prandaj, ne presim nga të gjithë liderët që të veprojnë me përgjegjshmëri, të përmbahen nga çdo retorikë nxitëse dhe të kontribuojnë në krijimin e një mjedisi besimi dhe stabiliteti rajonal. Gjatë gjithë këtij viti, në vazhdimësi kemi theksuar rëndësinë e pranimit të fakteve, nderimit të viktimave, mbështetjes për identifikimin e personave të pagjetur, si dhe promovimit të bashkëjetesës paqësore mes njerëzve. Kjo është pikërisht ajo që ne po bëjmë, si përmes dialogut të lehtësuar, ashtu edhe në kuadër të procesit të zgjerimit”, ka thënë Hipper.
E shkarkimin e ministres së Aleksandër Vuqiq, po e kërkon deputeti i vetëm shqiptar në Kuvendin e Serbisë, Shaip Kamberi.
“Në cilësinë e deputetit në Parlamentin e Republikës së Serbisë, do të inicioj kërkesën për shkarkimin e ministres. Në të kundërtën, heshtja dhe mungesa e veprimit do të kuptohen si miratim i deklaratës së saj dhe si qëndrim zyrtar i të gjithë Qeverisë”, u shpreh Kamberi.
Por, deklaratat e tilla nga qeveritarët serb, nuk sollën befasi në Kosovë.
Kjo meqë ky shtet, ende refuzon të kërkoj falje për viktimat e luftës.
“Nuk më ka habitë deklarata, por është një dëshmi se çfarë bindje kanë për shqiptarët dmth Serbia, secili serb në këtë rast sepse në vend që të kërkojë falje për gjithë ato krime masakra që i ka kryer në Kosovë Serbia, kjo del edhe me një deklaratë edhe më të rëndë për një spastrim etnik gjë që e dëshmon se gjithë atë krim që e kanë bërë në Kosovë, kjo dëshmon se nuk iu ka mjaftuar dhe kanë dashur të bëjnë edhe më shumë”, theksoj Qeriqi.
E ish-ushtarakët thonë se deklaratat e tilla tregojnë se mendësia fashiste në qeverinë serbe nuk ka ndryshuar.
“Te një pjesë e opinionit serb dhe shqiptar kjo ndikon sepse në vend të një fjalori përafrues në mes dy kombeve, këtu kemi një fjalor të urrejtjes, të përçarjes, armiqësisë, gjë që edhe serbët të cilët jetojnë në Kosovë nuk e kanë të lehtë të fokusohen në atë se çka është e drejtë dhe çka s’është e drejtë, a duhet të dëgjohet ministrja e Serbisë apo institucionet e Kosovës”, u shpreh Gecaj.
Të martën, shkarkimin e ministres Paunoviq, e ka kërkuar edhe partia opozitare në Serbi, Lëvizja e Qytetarëve të Lirë.
Ndërsa reagime të ashpra ndaj kësaj deklarate, pati edhe në Shqipëri e Maqedoni të Veriut.
