Ministri në detyrë i Mbrojtjes, Ejup Maqedonci, ka bërë të ditur se kanë vazhduar përgatitjet për dislokimin e kontingjentit të Forcës së Sigurisë së Kosovës (FSK) në kuadër të misionit të Forcës Ndërkombëtare të Sigurisë (FNS), pas vendimit të Qeverisë dhe Kuvendit të Kosovës për pjesëmarrjen në këtë mision.
Sipas Maqedoncit, aktualisht katër pjesëtarë të FSK-së i janë bashkuar misionit dhe do të shërbejnë në shtabin e FNS-së, ku do të kontribuojnë në planifikimin, koordinimin dhe mbështetjen e operacioneve.
Ai bëri të ditur se pjesa tjetër e kontingjentit ka përfunduar të gjitha përgatitjet operacionale dhe logistike dhe, pas koordinimit me shtabin e FNS-së, do të dislokohet në Gaza për të nisur kryerjen e detyrave në kuadër të misionit.
“Pas vendimit të Qeverisë dhe Kuvendit të Republikës së Kosovës për angazhimin e Forcës së Sigurisë së Kosovës në kuadër të misionit të Forcës Ndërkombëtare të Sigurisë (FNS), po vazhdojnë përgatitjet për dislokimin e kontingjentit tonë në koordinim të ngushtë me shtabin e FNS-së. Aktualisht këtij misioni i janë bashkuar katër pjesëtarë të FSK-së, të cilët do të shërbejnë në shtabin e FNS-së, duke kontribuar në planifikimin, koordinimin dhe mbështetjen e operacioneve të misionit. Pjesa tjetër e kontingjentit ka përfunduar të gjitha përgatitjet operacionale dhe logistike dhe, pas koordinimit me shtabin e FNS-së, do të zbarkojë në Gaza për të filluar kryerjen e detyrave në kuadër të misionit”, ka shkruar Maqedonci në një postim në Facebook./teve1.info/
