Takim gjatë ditës, kryeministri në detyrë, Albin Kurti ka mbajtur edhe me të parin e Partisë Demokratike të Kosovës, Bedri Hamza. Nga ky takim nuk ka pasur rezultate, i pari i PDK-së tha se do të qëndrojnë në opozitë dhe iu uroi suksese partive tjera për bashkëpunime derisa i pari i Vetëvendosjes, Kurti tha se takimi ka qenë konstruktiv dhe se nuk i takon vetëm atij për të zgjedhur presidentin.
Të dy erdhën para orës 09:00.
Kryeministri në detyrë, Albin Kurti e kryetari i Partisë Demokratike të Kosovës, Bedri Hamza madje u panë edhe në disponim të mirë e me optimizëm.
I pari që foli para gazetarëve ishte Hamza, i cili tha se si parti do të qëndrojnë në opozitë.
“Pozicioni i PDK-së është që në këtë mandat të jetë në opozitë. Ne do të bashkëpunojmë me të gjitha forcat politike brenda Kuvendit, në dobi dhe interes të qytetarëve të Kosovës. Për të gjitha ato çështje me interes unë kam insistuar dhe premtuar se vota e PDK-së do jetë pro, duke përfshirë marrëveshje financiare, ndërkombëtare, që janë në interes të qytetarëve. PDK do a ketë rolin e vet konstruktiv si parti opozitare. PDK nuk ka vija të kuqe dhe ka qenë e hapur për të biseduar, por pozicioni ynë është që të jemi në opozitë”, deklaroi Bedri Hamza.
Por ai nuk tregoi nëse do të ketë edhe takime të tjera me Kurtin.
“Të gjitha partitë e tjera nuk mund ta zgjedhin presidentin pa LVV. LVV duhet të gjejë partnerë sipas nevojave dhe kritereve të tyre”, shtoi Hamza.
Takimin ndryshe e përshkroi kreu i Vetëvendosjes, Albin Kurti.
“E falënderoj kryetarin Hamza për këtë takim, i cili ishte konstruktiv dhe kaloi në atmosferë të vullnetit e interesimit për t’i dhënë institucione të reja Kosovës, në përputhje me vullnetin e popullit. Për momentin nuk mund të themi se kemi një rezultat konkret, ndonjë të arritur që do të mund ta ndaj me publikun. Uroj që kjo frymë e konstruktivitetit të mbizotërojë edhe në vijim dhe që, në përputhje me afatet kushtetuese, t’i konstituojmë institucionet. Për bindjen time, vullneti është aty dhe atmosfera konstruktive duhet të vazhdojë të mbizotërojë”, theksoi kryeministri në detyrë, Albin Kurti.
Kurti madje bëri matematikë me numra.
Por përsëriti deklaratën që nuk i takon vetëm partisë fituese të bëjë përpjekje për zgjedhjen e presidentit.
“Si tri subjekte të mëdha, që së bashku kanë 93 deputetë – 53 nga Vetëvendosje, 22 nga PDK-ja dhe 18 nga LDK-ja – kemi numrin e mjaftueshëm të deputetëve që të konstituojmë të gjitha institucionet e legjislaturës së 11-të. Për qeverisje përgjegjësia bie mbi ne, por për zgjedhjen e presidentit të gjithë kemi përgjegjësi. Pikënisje do ta kishim një figurë konsensuale, dikë të asnjë partie, përtej polemikave të skenës aktuale, që i ka vlerat e dëshmuara kombëtare e profesionale dhe të jetë shprehje e unitetit”, shtoi ai.
Takim me Kurtin sy më sy nuk pranuan Aleanca për Ardhmërinë e Kosovës.
Kryetari i saj, Ardian Gjini tha se i dinë kushtet e tyre dhe nëse plotësohen do të votojnë për president.
