Ish-kryeministri dhe kryetari i Aleancës për Ardhmërinë e Kosovës, Ramush Haradinaj, ka bërë thirrje që Kosova të ndërmarrë veprime të menjëhershme për të siguruar që kandidatura e saj për anëtarësim në NATO të jetë pjesë e agjendës së samitit të ardhshëm të aleancës, i cili pritet të mbahet në Shqipëri.
Përmes një postimi në Facebook, Haradinaj ka thënë se, ndonëse koha është e kufizuar, ky objektiv mund të arrihet me angazhim serioz.
“Aleanca më e fuqishme politiko-ushtarake në botë, NATO, e cila e shpëtoi popullin tonë nga gjenocidi, mbajti samitin e radhës në Turqi. Kosova duhet të veprojë menjëherë që në samitin e ardhshëm të NATO-s në Shqipëri të diskutohet kandidatura e saj për anëtarësim. Edhe pse koha është e shkurtër, me punë serioze ky synim është i arritshëm. Kush nuk e mbështet këtë objektiv strategjik të Kosovës është ose shkurtpamës, ose nuk e kupton përgjegjësinë e postit që mban”, ka shkruar Haradinaj.
Ndryshe, sekretari i Përgjithshëm i NATO-s, Mark Rutte, njoftoi të mërkurën nga Turqia se samiti i radhës i Aleancës së Atlantikut të Veriut do të zhvillohet në Shqipëri.
Njoftimi u bë gjatë një konference shtypi pas punimeve të Samitit të NATO-s në Ankara, ku liderët e vendeve anëtare diskutuan për sigurinë euroatlantike, rritjen e investimeve në mbrojtje dhe sfidat me të cilat përballet Aleanca.
Mbajtja e samitit të ardhshëm në Shqipëri përbën një moment të rëndësishëm për vendin, i cili është anëtar i NATO-s që prej vitit 2009 dhe do të presë për herë të parë një takim të nivelit më të lartë të Aleancës./teve1.info/
