Kryenegociatori i Kosovës, Zulfaj, ka pritur në takim raportuesin e Parlamentit Evropian për Kosovën, Riho Terras, të cilin e ka falënderuar për mbështetjen e vazhdueshme ndaj integrimit evropian të Kosovës.
Sipas njoftimit, gjatë takimit u diskutua për rezolutën e Parlamentit Evropian për Kosovën, të miratuar më 17 qershor 2026, e cila e cilëson anëtarësimin e Kosovës në Bashkimin Evropian si një zgjedhje të qartë strategjike dhe gjeopolitike.
Rezoluta vlerëson gjithashtu përkushtimin e Kosovës ndaj reformave evropiane, sundimit të ligjit, mbrojtjes së të drejtave dhe lirive themelore, luftës kundër korrupsionit dhe forcimit të institucioneve demokratike.
Në takim u theksua se Parlamenti Evropian mbështet aplikimin e Kosovës për anëtarësim në BE dhe u bën thirrje Këshillit të Bashkimit Evropian dhe Komisionit Evropian të ndërmarrin hapat e nevojshëm për vlerësimin e aplikimit dhe avancimin e vendit drejt statusit të kandidatit.
Zulfaj ka theksuar se marrja e statusit të vendit kandidat është një kërkesë legjitime e Kosovës dhe se ky proces duhet të pasohet me hapjen e negociatave të anëtarësimit, bazuar në meritë dhe në përmbushjen e kritereve të kërkuara.
Rezoluta e Parlamentit Evropian mbështet gjithashtu aplikimin e Kosovës për anëtarësim në Këshillin e Evropës, përkrah orientimin drejt programit të NATO-s “Partneriteti për Paqe”, kërkon përgjegjësi për sulmin terrorist në Banjskë dhe u bën thirrje pesë shteteve anëtare të BE-së që ende nuk e kanë njohur Kosovën ta bëjnë këtë.
Në fund, u ritheksua se Kosova mbetet e përkushtuar ndaj vlerave dhe standardeve të Bashkimit Evropian, duke vazhduar zbatimin e reformave dhe adresimin e fushave ku kërkohet përparim i mëtejshëm./teve1.info/
