Është java e parë e korrikut.
Mirëpo, përkundër që kanë kaluar shtatë ditë, punëtorët e Trainkosit ende nuk i kanë marrë pagat.
Kryetari i sindikatës së punëtorëve në këtë institucion, Florim Gjyrevci, tregon se nga ndërmarrja u janë arsyetuar se janë në pritje të transferimit të disa mjeteve nga qeveria.
“Sipas informatave te marra nga menaxhmenti i ndërmarrjes, arsyeja e mosekzekutimit te pagave lidhet me faktin se Trainkos Sh.A. është ende ne pritje te transferimit te mjeteve financiare nga Ministria e Infrastrukturës. Përgjegjësia për zbatimin ne kohe te obligimeve financiare ndërinstitucionale u takon institucioneve kompetente. Sindikata u bën thirrje Ministrisë së Infrastrukturës dhe te gjitha institucioneve përgjegjëse qe te ndërmarrin masa urgjente për sigurimin dhe transferimin e mjeteve financiare, ne mënyre qe pagat e punëtoreve te ekzekutohen menjëherë dhe te shmangen pasojat ekonomike e sociale qe kjo situatë po u shkakton punëtorëve”, ka thënë Gjyrevci.
Kryesindikalisti Gjyrevci thotë se e mërkura do të jetë dita e fundit deri kur do t’i presin pa reagim pagat.
“Do të presim deri nesër që të takohemi edhe me bordin dhe menaxhmentin dhe do të hyjnë në grevë. Punëtorët kanë qenë të gatshëm nga sot të fillojnë por do të presim edhe nesër se çfarë do të ndodhë”, theksoj tutje Gjyrevci.
Televizioni ka kërkuar përgjigje edhe nga Ministria e Infrastrukturës se për çfarë arsye ka pasur vonesa për të kryer obligimet financiare ndaj Trainkosit, por deri në këtë kohë nuk ka marrë përgjigje.
