Ruzhdi Shehu, kryetar i Komunës së Junikut, ka njoftuar se në fshatin Gjocaj është përuruar “Ballkoni Panoramik”, një investim i ri që synon të pasurojë ofertën turistike të kësaj komune.
Shehu bëri të ditur se projekti është realizuar në kuadër të iniciativës “Mirdita Junik”, të cilën e cilësoi si një dëshmi të bashkëpunimit ndërkufitar ndërmjet Kosovës dhe Shqipërisë.
Sipas tij, projekti bashkon vlerat natyrore, kulturore dhe turistike të dy zonave, duke krijuar mundësi të reja për zhvillimin e turizmit të qëndrueshëm.
“Sot në fshatin Gjocaj përuruam Ballkonin Panoramik, një pikë e re turistike që i shtohet Komunës së Junikut. Realizimi i këtij investimi vjen në kuadër të projektit “Mirdita Junik”, një projekt që dëshmon rëndësinë e bashkëpunimit ndërkufitar mes Kosovës dhe Shqipërisë, duke bashkuar vlerat natyrore, kulturore dhe turistike të dy trevave tona. Në këtë rrugëtim falënderojmë Bashkimin Evropian për mbështetjen, si dhe partnerët tanë në këtë projekt: CHëB Kosova, Bashkinë Mirditë dhe Qendrën UET , për kontributin dhe bashkëpunimin në krijimin e mundësive të reja për zhvillimin e turizmit të qëndrueshëm. Nga bukuritë natyrore të Junikut, vazhduam me hapjen e edicionit të tretë të Festivalit “Kah Drita”. Mirë se vini në Junik!”, ka shkruar Ruzhdi Shehu në një postim në rrjetin social “Facebook”.
Ndryshe, Juniku është një ndër komunat me numër më të vogël të banorëve në Kosovë.
