Kryetarja në detyrë e Kuvendit të Republikës së Kosovës, Albulena Haxhiu, zhvilloi sot një vizitë në Agjencinë e Kosovës për Inteligjencë (AKI), ku u prit nga drejtori i Agjencisë, Petrit Ajeti, dhe zyrtarë të tjerë të institucionit.
Gjatë vizitës, Haxhiu u njoftua nga afër me punën, organizimin dhe prioritetet e AKI-së, si institucion kyç në mbrojtjen e sigurisë dhe interesave të Republikës së Kosovës.
Me këtë rast, ajo shprehu vlerësimin për profesionalizmin dhe përkushtimin e zyrtarëve të AKI-së në përmbushjen e misionit të tyre kushtetues dhe ligjor, duke theksuar rëndësinë e rolit që Agjencia ka në garantimin e sigurisë kombëtare.
Haxhiu theksoi se forcimi i kapaciteteve të institucioneve të sigurisë dhe bashkëpunimi i ngushtë ndërinstitucional mbeten parakushte për një Republikë të sigurt, demokratike dhe të përgatitur për t’u përballur me sfidat e së ardhmes./teve1.info/
