Raporti i fundit i zbulimit financiar të presidentit amerikan, Donald Trump tregon se ai fitoi rreth 1.2 miliardë dollarë gjatë vitit të kaluar nga investimet dhe bizneset e lidhura me kriptovalutat, duke tejkaluar të ardhurat nga sektori i pasurive të paluajtshme, mbi të cilin ndërtoi karrierën e tij.
Pjesa më e madhe e këtyre të ardhurave erdhi nga World Liberty Financial, i cili gjeneroi më shumë se 500 milionë dollarë nga shitja e “governance tokena”, “stablecoin” dhe aseteve të tjera kriptografike, shkruan Associated Press.
Ndërkohë, CIC Digital LLC realizoi mbi 600 milionë dollarë nga shitja e monedhave “meme” me imazhin e Trumpit.
Raporti, që përfshin mbi 900 faqe, zbulon gjithashtu të ardhura të konsiderueshme nga marrëveshje të reja ndërkombëtare për hotele, resorte dhe apartamente.
Një projekt në Emiratet e Bashkuara Arabe gjeneroi 10.4 milionë dollarë, një zhvillim në Arabinë Saudite 9 milionë dollarë, ndërsa projekte në Rumani dhe Katar sollën nga 5 milionë dollarë secili.
Dokumenti ngre gjithashtu pikëpyetje për konflikt të mundshëm interesi, pasi disa prej këtyre vendeve ishin në negociata me Shtetet e Bashkuara për tarifa, ndihmë ushtarake dhe çështje të tjera strategjike, ndërsa biznesi familjar i Trump po zgjeronte aktivitetin e tij.
Trump përfitoi gjithashtu miliona dollarë nga shitja e librave dhe produkteve të markës së tij. Libri “Save America” gjeneroi rreth 1.9 milionë dollarë, ndërsa “Letters to Trump” dhe “A MAGA Journey” sollën mbi 590 mijë dhe 552 mijë dollarë respektivisht. “Trump Bibles” gjeneroi 208,486 dollarë.
Raporti tregon gjithashtu se paditë e zgjidhura kundër kompanive mediatike, përfshirë ABC, CBS dhe Meta, sollën më shumë se 80 milionë dollarë, ndërsa Trump vazhdon të ketë një detyrim prej 50 milionë dollarësh ndaj E. Jean Carroll, në pritje të apelimit.
