Në 36-vjetorin e Deklaratës Kushtetuese të 2 korrikut, u.d. Presidentja e Kosovës, Albulena Haxhiu, ka pritur në takim disa nga delegatët e asaj kohe, së bashku me Kryeministrin Albin Kurti dhe Zëvendëskryeministren Donika Gërvalla-Schwarz.
Ajo ka vlerësuar se Deklarata e 2 korrikut 1990 përbën një nga aktet më të rëndësishme në historinë shtetformuese të Kosovës.
“Sot, në 36-vjetorin e Deklaratës Kushtetuese të 2 korrikut, së bashku me Kryeministrin Albin Kurti dhe Zëvendëskryeministren Donika Gërvalla-Schwarz, mirëpritëm disa nga delegatët e asaj kohe në Kuvendin e Republikës së Kosovës, për t’i nderuar dhe për të kujtuar një nga aktet më të rëndësishme në historinë tonë shtetformuese”, ka shkruar Haxhiu.
Sipas saj, më 2 korrik 1990 delegatët e Kuvendit nuk heshtën përballë mbylljes së dhunshme të institucionit.
“Më 2 korrik 1990, kur dyert e Kuvendit u mbyllën me forcë, delegatët e Kosovës nuk heshtën. Ata folën në emër të popullit edhe jashtë sallës, duke dëshmuar se legjitimiteti buron nga vullneti i qytetarëve”, ka shtuar ajo.
Haxhiu theksoi se Deklarata Kushtetuese shënoi një kthesë historike në rrugën drejt pavarësisë së Kosovës, duke u pasuar nga ngjarje të tjera të rëndësishme si Kushtetuta e Kaçanikut, referendumi për pavarësi, organizimi institucional i viteve ’90, lufta e UÇK-së dhe shpallja e pavarësisë.
“Ky akt u bë gurthemel në rrugën drejt Republikës së Kosovës… Ishte një rrugë e gjatë, e ndërtuar me vizion, qëndresë dhe sakrificë”, ka shkruar ajo.
Në fund, ajo ka vlerësuar delegatët e 2 korrikut dhe të gjithë kontribuuesit në ndërtimin e shtetit të Kosovës, duke theksuar se liria dhe sovraniteti kërkojnë përkushtim të vazhdueshëm institucional.
