Një shtetase e huaj është sulmuar me thikë dhe më pas është grabitur mbrëmjen e së mërkurës në Prishtinë.
Sipas raportit 24-orësh të Policisë së Kosovës, ngjarja ka ndodhur rreth orës 22:00, kur një person ende i paidentifikuar dyshohet se e ka sulmuar viktimën dhe i ka marrë para të gatshme dhe një telefon celular.
“Rreth orës 22:00, një person i panjohur dyshohet se ka sulmuar viktimën me një mjet të mprehtë dhe i ka grabitur para të gatshme si dhe një telefon celular”, thuhet në raportin e Policisë.
Si pasojë e sulmit, viktima ka pësuar lëndime trupore dhe është dërguar për trajtim mjekësor.
Pas marrjes së ndihmës së nevojshme mjekësore, ajo është liruar.
Policia e Kosovës ka nisur hetimet për identifikimin e të dyshuarit dhe zbardhjen e plotë të rrethanave të rastit.
