Forca e Sigurisë së Kosovës (FSK) i është bashkuar operacionit të kërkim-shpëtimit në Liqenin e Batllavës, ku një person dyshohet se është zhdukur pasi ka hyrë në ujë.
Përveç pjesëtarëve të FSK-së, në vendin e ngjarjes janë të angazhuara edhe njësitë e Policisë së Kosovës, si dhe ekipet e tjera të kërkim-shpëtimit, të cilat po vazhdojnë përpjekjet për lokalizimin e personit.
Zëdhënësi i Policisë për Rajonin e Prishtinës, Enis Pllana, bëri të ditur se rasti është raportuar rreth orës 13:00 dhe se operacioni është ende në zhvillim.
“Rreth orës 13:00, Policia ka pranuar informatën se një person dyshohet se ka hyrë në ujë në Liqenin e Batllavës dhe më pas nuk është parë të dalë. Menjëherë pas pranimit të informatës, janë angazhuar të gjitha njësitë relevante policore, si dhe njësitë e tjera të kërkim-shpëtimit, me qëllim të lokalizimit të personit. Aktualisht, operacioni i kërkimit dhe shpëtimit është duke vazhduar”, ka deklaruar Pllana në një përgjigje me shkrim.
