Një 75-vjeçar ka humbur jetën pasi dyshohet se ka rënë në një pusetë derisa ishte duke e pastruar atë.
Zëdhënësi i Policisë së Kosovës për rajonin e Gjilanit, Ismet Hashani, ka bërë të ditur për teve1.info se rasti ka ndodhur në fshatin Dobërqan të Gjilanit, rreth orës 14:23.
Sipas tij, njësitet patrulluese kanë dalë me urgjencë në vendin e ngjarjes, ndërsa aty kanë intervenuar edhe zjarrfikësit, të cilët kanë bërë zbrazjen e pusetës dhe kanë nxjerrë trupin e viktimës.
“Me datën 29/06/2026, rreth orës 14:23, Policia e Kosovës në Gjilan ka pranuar një thirrje lidhur me një informatë në fshatin Dobërqan. Njësitet patrulluese me urgjencë i janë përgjigjur rastit duke dalë në vendin e ngjarjes. Nga hetimet e para dyshohej se një person ka rënë në një pusetë përderisa ishte duke bërë pastrimin e saj. Në vendngjarje kanë dalë edhe njësia e zjarrfikësve, të cilët kanë bërë zbrazjen e pusetës. Nga aty kanë tërhequr trupin e viktimës, ndërsa mjeku kujdestar ka konfirmuar vdekjen e viktimës (1951)”, ka thënë ai.
Hashani ka njoftuar gjithashtu se në vendin e ngjarjes kanë dalë edhe hetuesit rajonalë dhe njësitë e forenzikës.
Me vendim të prokurorit të shtetit, trupi i pajetë është dërguar në Institutin e Mjekësisë Ligjore (IML) për obduksion.
“Njësitet e hetimeve rajonale të Policisë së Kosovës po i hetojnë rrethanat se si ka ardhur deri te ky rast”, ka theksuar Hashani./teve1.info/
