Numri i bizneseve të reja të regjistruara në Kosovë ka shënuar rritje gjatë gjashtëmujorit të parë të vitit 2026, krahasuar me të njëjtën periudhë të vitit të kaluar.
Sipas të dhënave zyrtare të Agjencisë për Regjistrimin e Bizneseve të Kosovës (ARBK), të publikuara nga Ministria e Industrisë, Ndërmarrësisë, Tregtisë dhe Inovacionit, në periudhën 1 janar – 29 qershor 2026 janë regjistruar gjithsej 6,834 biznese të reja.
Në të njëjtën periudhë të vitit 2025 ishin regjistruar 6,545 biznese, që nënkupton një rritje prej 289 bizneseve gjatë këtij viti.
Ministria vlerëson se ky trend pasqyron një zhvillim pozitiv të aktivitetit ekonomik dhe interesim në rritje për ndërmarrësi në vend.
“Ministria e Industrisë, Ndërmarrësisë, Tregtisë dhe Inovacionit dhe ARBK-ja, mbeten të përkushtuar në krijimin e kushteve sa më të favorshme për zhvillimin e bizneseve dhe promovimin e një ekonomie të qëndrueshme dhe gjithëpërfshirëse”, theksohet në fund të njoftimit./teve1.info/
