Ministrja e Mjedisit dhe Planifikimit Hapësinor, Fitore Pacolli, ka nxjerrë vendim për forcimin e mbrojtjes së drunjve urbanë dhe hapësirave të gjelbra në të gjithë Kosovën.
Sipas këtij vendimi, ndalohet prerja, krasitja ekstreme dhe zhvendosja e drunjve pa pëlqimin paraprak të Ministrisë së Mjedisit.
Po ashtu, komunat obligohen të bëjnë inventarizimin e plotë të drunjve urbanë dhe të zbatojnë standarde për mbrojtjen dhe mirëmbajtjen e tyre.
Vendimi parasheh gjithashtu që çdo projekt që prek hapësirat e gjelbra t’i nënshtrohet procedurave të vlerësimit mjedisor.
Për çdo dru të larguar do të zbatohet parimi “1 me 3”, që nënkupton mbjelljen e tre drunjve të rinj si zëvendësim.
Ministria ka bërë të ditur se qëllimi i këtij vendimi është ruajtja e natyrës, rritja e sipërfaqeve të gjelbra dhe krijimi i mjediseve më të shëndetshme për qytetarët dhe brezat e ardhshëm.
