Ministri në detyrë i Bujqësisë, Pylltarisë dhe Zhvillimit Rural i Republikës së Kosovës, Armend Muja, ka zhvilluar një vizitë zyrtare në Tiranë me ftesë të ministrit të Bujqësisë dhe Zhvillimit Rural të Republikës së Shqipërisë, Andis Salla.
Gjatë vizitës, palët kanë nënshkruar dy marrëveshje bashkëpunimi që synojnë thellimin e koordinimit institucional dhe avancimin e politikave të përbashkëta në sektorin agro-ushqimor.
Marrëveshjet parashohin gjithashtu rritjen e standardeve në fushën e sigurisë ushqimore, veterinarisë dhe fitosanitetit.
Sipas njoftimit, dokumentet e nënshkruara përfshijnë edhe zgjerimin e bashkëpunimit në zhvillimin rural, mbështetjen e fermerëve përmes politikave bujqësore dhe skemave financiare, si dhe përafrimin me standardet dhe praktikat e Bashkimit Evropian.
Një ndër prioritetet e bashkëpunimit mbetet modernizimi i sektorit të bujqësisë përmes digjitalizimit të shërbimeve, forcimit të kërkimit shkencor, inovacionit dhe transferimit të teknologjive bashkëkohore, me synim rritjen e efikasitetit dhe konkurrueshmërisë.
“Ky bashkëpunim vlerësohet si një hap i rëndësishëm në konsolidimin e partneritetit strategjik ndërmjet Kosovës dhe Shqipërisë, duke kontribuar në zhvillimin e qëndrueshëm të bujqësisë, rritjen e sigurisë ushqimore dhe përmirësimin e mirëqenies së komuniteteve rurale në të dy vendet tona”, theksohet në fund të njoftimit./teve1.info/
