Së shpejti, Universiteti i Prishtinës pritet të hap dyert për pranimin e studentëve të rinj.
E këtë vit do të pranohen rreth 8 mijë studentë, të cilët do të zgjedhin një nga 146 programet që ofron ky universitet publik.
Nga kjo shifër, rreth 5 mijë e 600 do të pranohen në nivelin Bachelor, kurse në Master rreth 2 mijë e 400.
Risitë e këtij konkursi treguan për televizionin nga UP.
“Kemi programe të reja, është teknologjia arsimore një program që përgatit ekspertë të cilët do të digjitalizojnë proceset e arsimit. Është për herë të parë dhe nuk ofrohet nga asnjë Universitet në Kosovë ose edhe në rajon. Programi është mjaft inovativ”, thotw Majlinda Gjelaj – prorektore në Universitetin e Prishtinës.
Por ndër vite, interesimi për të studiuar në Universitetin e Prishtinës, në bazë të statistikave, ka rënë.
“Është rënie e numrit të maturantëve në përgjithësi, vitin e kaluar vetëm 12 mijë maturantë kanë përfunduar Testin e maturës me sukses, sivjet kanë hyrë në test 19 mijë maturantë dhe do e shohim sa po e përfundojnë…poashtu edhe largimet nga Kosova kanë bërë që të bie numri i studentëve”, shpjegon Gjelaj.
Madje Gjelaj thotë se për ta rritur cilësinë, është ulur numri i studentëve në grupe.
Por pikërisht aspekti i cilësisë, sipas njohësit të çështjeve të arsimit, është ndër arsyet e rënies së interesimit për të studiuar në universitete publike.
“Numri i nxënësve për çdo vit është duke rënë kjo për shkak të shumë rrethanave nëpër të cilat ka kaluar vendi i ynë, por edhe për shkak të politikave të rritjes së natalitetit. Pastaj mund të themi aspekti i cilësisë mund të jetë një faktor në veti, pastaj jemi të vetëdijshëm që rekrutimi i stafit, mësimdhënësve në universitete publike të cilët zënë pozita pa ndonjë meritë”, thotw Argjend Osmani – njohës i arsimit.
Në konkursin e vitit paraprak për studentë të rinj në Universitetin e Prishtinës, për 5 mijë e 723 vende, kishin kandiduar vetëm 3 mijë e 398 të rinj.
