Pishina e Gërmisë ka nisur sezonin veror me disa ndryshime për vizitorët. Qytetarët vlerësojnë përmirësimin e pastërtisë dhe kushteve krahasuar me vitin e kaluar, por kanë ankesa për çmimet e çadrave.
Ditët e nxehta të verës kanë bërë që shumë qytetarë të Prishtinës t’i drejtohen Pishinës së Gërmisë këtë të diel.
E këtë vit, gjendja në këtë pishinë duket të jetë dukshëm më e mirë krahasuar me sezonin e kaluar.
Kjo pasi pastërtia e ujit dhe e ambientit ishte prioriteti kryesore, sipas drejtoreshës së Pishinës së Gërmisë, Medina Krasniqi Mushica.
Përveç kësaj, Krasniqi-Mushica tregon se këtë sezon janë sjellë edhe disa risi.
“Ka shumë risi që kemi sjell këtë vit. Qysh po e shihni edhe vetë është një mini park për fëmijë që e kemi sjell këtë vit ku ka sjell shumë atraksion dhe argëtim për fëmijë. Janë brendet në fushën e gastronomisë, brende të njohura të ushqimit ku po i bon që vizitorët me u ni më të sigurt te pjesa e ushqimit”, tha ajo.
E nga e mëkuara në këtë pishinë do të filloi edhe kursi i notit.
“Pjesë munden me marr të gjithë fëmijët është kursi i notit që fillon prej datës një korrik…Po ka interesim të mjaftueshëm. Ka fillu aplikimi”, tregoi Mushica.
Se këtë vit gjendja në Pishinën e Gërmisë është më e mirë e thonë edhe qytetarët.
“Pastërtia është në nivel nuk është si vitin e kalum. Edhe niveli i sigurisë është shumë i mirë qashtu që jemi të kënaqur”, Xhelal Karabeg-qytetar.
“Unë mendoj se është më bukur se vitin e kaluar sepse uji është më i pastër. Si duket fundin e kan pastru ma mirë sivjet. Vjet ka qenë uji më i ndotur”, u shpreh Shyqyri Thaçi – qytetar.
Por, ankesa kanë vetëm për çmimet e çadrave.
“Nuk kemi pagu atje po këto na kan shti me pagu, Dyshekun atje me pagu dhjetë euro po na jem penzionera. Tetë me pagu ato e pesë euro dy kreveta këtu shumë është”, tha Ilmi Krasniqi, qytetar.
Pishina e Gërmisë do të jetë e hapur deri me një shtator.
