Mes Kosovës dhe Shqipërisë, në vitin 2022 u nënshkrua një Memorandum Bashkëpunimi për termocentralin e Vlorës.
Katër vite më vonë, ky Memorandum Bashkëpunimi siç duket po e merrë fuqinë e plotë të zbatimit.
Përmes kësaj, Qeveria në detyrë e Kosovës, po synon që të realizohet edhe sjellja e gazit amerikan në Kosovë.
Përmes një adresimi online, ministrja në detyrë e ekonomisë, ka thënë se Kosova ka opsione tjera vendore për energji elektrike.
“E para: Kosova nuk ka zgjedhur importin nga shtetet e rajonit para prodhimit vendor të energjisë elektrike, ose para gazit amerikan, siç po aludohet. Përkundrazi: Ne kemi zgjedhur thëngjillin, e burimet e ripërtëritshme të energjisë si era e dielli, kogjenerimin për ngrohje qendrore, dhe efiçiencën e energjisë. Ky kombinim mbështetet në burime vendore dhe është më i liri për qytetarët e bizneset tona. E me gazifikim të qymyrit do të shtojmë kapacitete të reja që janë me teknologji më të avancuar e më pak ndotje”, tha ministrja në detyrë e Ekonomisë, Artane Rizvanolli.
Tutej, Rizvanolli ka potencuar se Kosova nuk është kundër gazit amerikan, por vetëm po gjen metoda më të lira që ai të vijë në Kosovë.
“E dyta: Nuk është e vërtetë që Qeveria e Kosovës është “kundër” gazit të lëngëzuar nga ShBA-të (LNG), siç thuhet. Ne qysh në vitin 2022 kemi nënshkruar një Memorandum Bashkëpunimi me Republikën e Shqipërisë me synim bashkëpunimin në termocentralin e Vlorës me LNG. Këtë e kemi konsideruar zgjidhje më të mirë, më praktike, më të shpejtë dhe ekonomikisht më të favorshme. Bashkëpunimi në energji me Republikën e Shqipërisë është shumë i natyrshëm; dhe, në vend të ndërtimit të gazsjellësit e infrastrukturës përcjellëse të gazit që merr kohë e ka kosto financiare, ne mund të importojmë LNG-në përmes Vlorës, të prodhojmë energjinë elektrike atje e ta transmetojmë përmes linjës së interkoneksionit 400 kV që e kemi të gatshme sot dhe nuk kërkon asnjë cent investim shtesë”.
Sipas ekspertit të energjisë, duhet t’I jepet një përgjigje konkrete projektit të gazit amerikan, pasi sipas tij asnjë nismë e institucioneve të Kosovës, nuk mund të krahasohet me gazin amerikan.
Javë më parë, e ngarkuara me punë në Ambasadën Amerikane ka kërkuar që Kosova të bëhet sa më shpejt pjesë e projektit të gazit amerikan, si projekt rajonal për energjinë elektrike.
