Kryeministri i Shqipërisë, Edi Rama ka folur për protestat kundër projektit të planifikuar në Zvërnec gjatë një interviste për France 24, duke deklaruar se pas tyre mund të ketë edhe ndikime nga faktorë të jashtëm.
Sipas Ramës, në protestat kundër projektit ka “ndërhyrje”, përfshirë nga Irani dhe aktorë të tjerë rajonalë, të cilët sipas tij nuk e mbështesin zhvillimin ekonomik të vendit.
“Saktësisht për çfarë po ndodh. Ka shumë ndërhyrje, qoftë ndërhyrje nga Irani, me të cilin jemi në një luftë kibernetike që prej tri vitesh ose ndërhyrje nga konkurrentët në të gjithë rajonin që nuk e duan këtë zhvillim në Shqipëri”, deklaroi Rama.
Ai shtoi gjithashtu se ekzistojnë edhe shqetësime të një pjese të qytetarëve, por theksoi se qeveria do të vijojë me projektet e planifikuara.
“Ne u zgjodhëm për të bërë atë që premtuam dhe mes tyre është edhe ky projekt”, u shpreh Rama.
Rama ka nënvizuar se në Tiranë ka protesta, ndërsa në zonën ku pritet investimi, sipas tij, ka mbështetje.
“Është shumë interesante, sepse në Tiranë ka protesta, ndërsa në Vlorë, ku është parashikuar të bëhet projekti, njerëzit e duan atë”, tha ai.
