Përveç orarit te rregullt, mbajtën edhe kujdestari.
Por për kujdestarinë që ia bënë sigurisë së shtetit, pjesëtarët e Forcës së Sigurisë së Kosovës, nuk u paguan.
Kësisoj dolën të dhënat e raportit vjetor të Zyrës Kombëtare të Auditimit.
Në këtë raport, thuhet që Ministria e Mbrojtjes ka kërkuar nga Ministria e Financave që të ndahen mjete shtesë, mirëpo kërkesa nuk është aprovuar.
“Ministria, për punën e kujdestarive ka paguar pjesëtaret e FSK-së, vetëm per muajin janar 2025. Po ashtu, kompensimi me dite pushimi, gjate vitit është bere për aq sa zhvillimi i aktiviteteve operative té FSK-së të mos ndikohet/pengohet. Ministria kishte bere kërkese ne vazhdimësi ne Ministrinë eFinancave, Punës dhe Transfereve për ndarje té buxhetit shtese për përmbushjen e obligimeve, por kjo kërkese nuk kishte gjetur mbështetje”, thuhet në raportin e auditimit.
Sipas Zyrës Kombëtare të Auditimit, vlera e borxhit për vitin 2025, që FSK ka ndaj ushtarëve të saj për kujdestarit e papaguara kap shifrën e mbi 2 milionë e 69 euro.
E për këto raste, Ministria e Mbrojtje rrezikohet që të ballafaqohet me padi gjyqësore.
“Ministria dhe Forca e Sigurisë së Kosovës nuk i kanë ndërmarrë veprimet për te i adresuar gjetjet nga raporti i ZKA-se, çka rezulton që pjesëtaret e FSK-se po dëmtohen në page përkatësisht ne te ardhurat e tyre, njëkohësisht demi i madh i bëhet edhe buxhetit sepse pjesëtarët e FSK-se edhe në këtë rast sikurseedhe në diferencën në pagë, e sikurse edhe në çështjet e meditjeve janë te detyruar që te drejtohen organeve gjyqësore për të kërkuar te drejtat e tyre dhe për rrjedhoje krijohen kosto e shpenzime te reja të cilat janë barre e buxhetit te institucionit”, shprehet avokati Adrian Bajraktari.
Kurse sipas ekspertit të sigurisë, Valdet Hoxha, mos pagesa e kujdestarisë dëmton edhe imazhin e Forcës së Sigurisë së Kosovës.
“Ka një mos planifikim të duhur sa i përket resursëve njërzore në këtë ministri, pastaj ul kridibilitetin e kësaj organizate kruciale për rëndësin e sigurisë dhe në tërësi për vendin. Natyrshëm, i qet një hije të keqe jo vetëm organizatës por edhe krijojn një përceptim të qytetarët të familjet e atyre punonjësve që nuk paguhen për ndërrimet, për kujdestarit e tyre dhe kështu mund të lëkundet imazhi i Ministrisë së Mbrojtjes”, shprehet Hoxha.
Në raport mes tjerash njëashtu thuhet se në vitin 2024 ministria kishte filluar plotësim ndryshimin e rregullores Nr.10/2019 për orarin e punës në FSK, ku pritej të adresohen çështjet specifike të FSK-së në lidhje me orarin e punës mirëpo as në këtë vit nuk është përmbyllur procesi i miratimit të rregullores.
Nga Ministria e Mbrojtjes, përmes një komunikate për media kanë theksuar se rekomandimet e ZKA-së do të trajtohen me prioritet dhe do të ndërmerren veprime konkrete për zbatimin e tyre.
