Maja e Gjeravicës është bërë skenë e një aktiviteti të veçantë alpinistik, ku 273 të rinj dhe të reja morën pjesë në një ngjitje të organizuar nga klubi alpin PBA Peak Bound.
Organizatorët thanë se bëhet fjalë për një nga ngjitjet me numrin më të madh të pjesëmarrësve të realizuara ndonjëherë në këtë zonë malore.
Përveç promovimit të aktivitetit fizik dhe dashurisë për natyrën, organizatorët theksuan se ngjarja kishte edhe një dimension simbolik. Ngjitja iu dedikua ish-udhëheqësve të Ushtrisë Çlirimtare të Kosovës që po gjykohen në Hagë.
Pjesëmarrësit e përshkruan aventurën si një përjetim të veçantë, ku sfida sportive u ndërthur me emocionet dhe reflektimin mbi ngjarjet historike që kanë shënuar vendin.
Në përfundim, organizatorët vlerësuan se ngjarja dëshmoi interesimin në rritje të të rinjve për aktivitetet malore, sportin dhe bashkëpunimin në komunitet, duke e përmbyllur me mesazhin: “273 pjesëmarrës, një majë dhe një qëllim”.
