Kryeministrja e Italisë, Giorgia Meloni , ka thënë se Donald Trump “shpiki plotësisht” një histori për të, pasi presidenti amerikan pretendoi se ajo iu lut të bënte një foto me të gjatë samitit të G7.
Dy udhëheqësit dukeshin se po e rikthenin marrëdhënien e tyre në rrugën e duhur duke pasur disa takime kokë më kokë në takimin në Evian, pasi u grindën në prill për shkak të luftës SHBA-Izrael në Iran.
Por duke iu referuar Melonit gjatë një interviste të shkurtër me La7 të Italisë – një version i dubluar i së cilës u transmetua nga rrjeti televiziv italian të premten – Trump tha: “Ajo ndoshta është e lumtur që fola me të. Nuk kisha nevojë të flisja me të. Ajo më lutej të bëja një foto me të. Ajo donte shumë një foto me mua. Nuk do ta kisha bërë, por më erdhi keq për të.”
Komentet provokuan zemërim në Itali dhe fjalë solidariteti për Melonin nga i gjithë spektri politik, me ministrin e jashtëm të Italisë, Antonio Tajani, që tha se kishte anuluar një udhëtim në SHBA javën e ardhshme, shkruan Guardian.
Duke iu përgjigjur një postimi video në Instagram me mbishkrimin “Unë dhe Italia nuk lypim kurrë”, Meloni tha se “disa gjëra meritojnë një përgjigje të menjëhershme”.
“Deklaratat e Donald Trump janë krejtësisht të sajuara. Sinqerisht, jam e tronditur. Nuk e di pse presidenti amerikan sillet në këtë mënyrë ndaj aleatëve të tij. Nuk është hera e parë që ndodh, mund të them vetëm se është për të ardhur keq që ai nuk tregon të njëjtën vendosmëri ndaj armiqve të perëndimit,” tha ajo.
