Komisioni Qendror i Zgjedhjeve (KQZ) ka përfunduar procesin e numërimit të votave, ndërsa të enjten pritet të nisë rinumërimi i tyre.
Sipas rezultateve të përpunuara, që përfshijnë të gjitha votat e hedhura, tetë nga dhjetë kandidatët më të votuar për deputetë vijnë nga Lëvizja Vetëvendosje, partia fituese e zgjedhjeve.
Kryeministri dhe lideri i LVV-së, Albin Kurti, kryeson listën me 342.331 vota. Pas tij renditet Glauk Konjufca me 264.330 vota, ndërsa vendin e tretë e mban Albulena Haxhiu me 165.126 vota.
Në vendin e katërt është Hekuran Murati me 137.810 vota, ndërsa e pesta renditet Donika Gërvalla-Schwarz me 131.841 vota.
Nga partitë opozitare, më i votuari është kryetari i PDK-së, Bedri Hamza, i cili ka siguruar 126.936 vota dhe renditet i gjashti në nivel vendi.
Top-dhjetëshen e plotësojnë Xhelal Sveçla me 109.263 vota, Vjosa Osmani-Sadriu me 92.234 vota, Ejup Maqedonci me 89.308 vota dhe Avni Dehari me 89.182 vota.
Ndërkohë, kryetari i LDK-së, Lumir Abdixhiku, renditet i 12-ti me 83.892 vota.
Sa i përket rezultatit përfundimtar të subjekteve politike, Lëvizja Vetëvendosje ka siguruar 47,13 për qind të votave, që përkthehen në 53 mandate në Kuvend. Partia Demokratike e Kosovës ka fituar 19,44 për qind të votave dhe 22 mandate, ndërsa Lidhja Demokratike e Kosovës ka marrë 16,69 për qind të votave, duke siguruar 18 mandate. Aleanca për Ardhmërinë e Kosovës ka fituar 6,74 për qind të votave dhe do të përfaqësohet me 7 deputetë.
