Dyshohet se janë përgjegjës për krimet që u kryen Masakrën e Reçakut.
Për këtë arsye, Policia e Kosovës, zbarkoi në Shtërpcë të dielën.
Në këtë aksion të Prokurorisë Speciale të Kosovës, prapa grilave përfunduan pesë serbë.
E të gjithë këta jetuan e vepruan në Kosovë për plot 27 vjet pas masakrës serbe, pamjet e të cilës e vunë botën në lëvizje.
Nga Shoqata e Invalidëve të Luftës, thonë se të njëjtit menduan se nuk do të kapën kurrë.
Madje, për këtë i fajësojnë edhe misionet nderkombëtare në Kosovë.
“Fajin për këta persona e ka administrata e UNMIK-ut edhe EULEX-it, për arsye se nuk është marrë fare me ta. Kështu që ata e kanë konsideru se më nuk merret askush me ta dhe kështu që kanë vazhdu me jetu të lirë”, ka thënë Qeriqi.
E këta dyshohet nuk janë të vetmit.
Numër më i madh i personave që dyshohet se kanë dorë në krimet e luftës, besohet se jetojnë ende në Kosovë, por që nuk kanë rënë ende në duart e drejtësisë.
“Kryesisht personat të cilët janë arrestuar edhe në të kaluarën edhe tani, kryesisht të njëjtit e kanë pasur apo e kanë ende vendbanimin në Kosovë, por numri i të cilëve arrestohet gjatë një viti kalendarik nuk është numër i madh. Nëse e krahasojmë me vitet e fundit, janë arrestuar diku 10 të dyshuar përbrenda një viti”, u shpreh Alija.
Faktor në moskapjen e kryerësve të krimeve të luftës, llogaritet të jetë edhe mosbashkëpunimi me Serbinë.
“Koha është armik i padukshëm në rastet e krimeve të tilla. Shto faktin këtu kur kemi parasysh se fqinji ynë verior nuk ka gatishmërinë, nuk ka vullnet fare për me bashkëpunu me organet tona të drejtësisë, për të siguruar eventualisht provat e ndonjëherë edhe prezencën edhe të vet të pandehurve sepse siç dihet një pjesë bukur e madhe e tyre vazhdojnë ta shfrytëzojën fqinjin tonë verior, përkatësisht Serbinë si strehë të tyre” , theksoj Bajraktari.
Aktualisht, Kosova dhe Serbia nuk kanë marrëveshje bashkëpunimi sa i përket krimeve të luftës dhe ndjekjes së tyre.
