Takimet e samitit të Grupit të Shtatë vendeve të botës filluan të martën në Evian të Francës, me udhëheqësit botërorë që u mblodhën për të diskutuar çështjet globale, me një fokus të veçantë në Iran, Ukrainë dhe Lindjen e Mesme.
Udhëheqësit e G7 nga Franca, Kanadaja, Gjermania, Italia, Japonia, Mbretëria e Bashkuar dhe Shtetet e Bashkuara e hapën ditën me bisedime të nivelit të lartë për Ukrainën, ku mori pjesë edhe Volodymyr Zelenskyy, presidenti i Ukrainës.
Presidenti i SHBA-së, Donald Trump, mbërriti gjithashtu të hënën për bisedime me udhëheqësit e tjerë dhe ishte i pranishëm në bisedimet për Ukrainën.
Bisedimet për Ukrainën vijnë menjëherë pas njoftimit të Presidentit të SHBA-së, Donald Trump, për një marrëveshje për t’i dhënë fund luftës 3 muaj e gjysmë të SHBA-së kundër Iranit. Trump tha se pati biseda të mira të dielën si me Zelenskyn ashtu edhe me Putinin.
“Tani që kjo (Irani) ka mbaruar, ne do të përqendrohemi në të”, tha ai në samitin e G7-ës, citon AP.
Udhëheqësit e Bashkimit Evropian, përfshirë Presidenten e Komisionit Evropian Ursula von der Leyen dhe Presidentin e Këshillit Evropian Antonio Costa, ishin gjithashtu të pranishëm.
Takimet e mëvonshme do të përqendrohen gjithashtu në zhvillimet në Lindjen e Mesme, si dhe në rritjen ekonomike dhe inteligjencën artificiale, shkruan Anadolu.
Përveç presidentit ukrainas, pritet të marrin pjesë disa të ftuar jashtë G7-ës, përfshirë kryeministrin indian Narendra Modi, presidentin brazilian Luiz Inacio Lula da Silva dhe udhëheqësit e Koresë së Jugut, Kenias dhe Egjiptit.
Pritet që të marrin pjesë edhe udhëheqësit e shteteve të Gjirit, ndër të cilët edhe Emiri i Katarit, Sheikh Tamim bin Hamad Al Thani dhe Presidenti i Emirateve të Bashkuara Arabe, Sheikh Mohamed bin Zayed Al Nahyan.
