Specialisti i njohur turk i otorinolaringologjisë dhe kirurgjisë së kokës dhe qafës nga Bursa, Ibrahim Hizalan, ka vlerësuar rëndësinë e Kongresit të 14-të Ballkanik të Otorinolaringologjisë dhe Kirurgjisë së Kokës dhe Qafës, duke theksuar se takime të tilla kontribuojnë në forcimin e bashkëpunimit profesional dhe shkencor ndërmjet specialistëve të rajonit.
Specialisti turk bëri të ditur se gjatë kongresit do të mbajë dy ligjërata shkencore me tematika të ndryshme.
“Mendoj se kjo bashkëpunim na sjell jo vetëm miqësi, por edhe shkëmbim idesh dhe zhvillime shkencore. Gjatë këtij kongresi do të mbaj dy ligjërata. Njëra ka të bëjë me otosklerozën, rastet e avancuara të saj, pacientët që nuk dëgjojnë më fare dhe mënyrat se si mund të trajtohen, qoftë përmes kirurgjisë apo rehabilitimit. Ligjërata e dytë ka të bëjë me retraksionet e membranës timpanike, si të trajtohen dhe si të menaxhohen”, tha ai.
Sipas tij, kongresi ofron mundësi edhe për njohjen me zhvillimet më të fundit në fushën e mjekësisë përmes kompanive të njohura ndërkombëtare që po prezantojnë teknologjitë dhe produktet e reja.
“Mendoj se kemi rreth 200 folës nga rreth 10 deri në 15 vende, vende të Ballkanit dhe gjithashtu nga jashtë rajonit. Ky është një takim shkencor me cilësi të lartë. Gjithashtu kemi kompani sponsorizuese shumë të njohura, ku mund të shohim dhe të eksplorojmë zhvillimet më të fundit në mjekësinë botërore”, theksoi ai.
