Ish-kryetari i Aleancës, Ramush Haradinaj, ka uruar 27-vjetorin e Çlirimit të Kosovës, duke e cilësuar fitoren e Ushtrisë Çlirimtare të Kosovës dhe hyrjen e forcave tokësore të NATO-s si ngjarjen më kulmore në historinë e re të vendit.
Përmes një postimi në Facebook, Haradinaj ka theksuar se kjo ditë shënon sakrificën dhe kontributin e të gjithë atyre që luftuan për lirinë e Kosovës.
“Sot, me nderim e përulje të përjetshme, kujtojmë trimat e UÇK-së nga të gjitha anët e Kosovës, sakrificën e dëshmorëve dhe martirëve, dhe dhimbjen e familjeve tona që dhanë më të shtrenjtit për lirinë e vendit”, ka shkruar ai.
Haradinaj ka shprehur gjithashtu mirënjohje për aleatët e Kosovës, të udhëhequr nga Shtetet e Bashkuara të Amerikës, si dhe për NATO-n, që sipas tij qëndruan përkrah popullit të Kosovës në ditët më vendimtare të historisë së saj.
“Mirënjohje për aleatët e Kosovës, të udhëhequr nga Shtetet e Bashkuara të Amerikës, dhe për NATO-n, që qëndruan përkrah popullit të Kosovës në ditët më vendimtare të historisë sonë”, ka theksuar Haradinaj.
Në fund të mesazhit të tij, ai ka uruar Kosovën, kombin shqiptar dhe miqtë e saj.
“Zoti e bekoftë Kosovën, mbarë kombin tonë dhe miqtë e saj”, ka përfunduar Haradinaj./teve1.info/
