Ushtruesja e Detyrës së Presidentes së Republikës së Kosovës, Albulena Haxhiu, është takuar me Presidenten e Sllovenisë, Nataša Pirc Musar, në margjinat e Samitit të Procesit të Bashkëpunimit të Evropës Juglindore (SEECP) që po mbahet në Sofje.
Sipas Presidencës, në takim u theksuan marrëdhëniet e mira ndërmjet dy vendeve dhe mbështetja e vazhdueshme e Sllovenisë për integrimin euroatlantik të Kosovës.
Haxhiu shprehu mirënjohje për përkrahjen sllovene në procesin e anëtarësimit të Kosovës në Këshillin e Evropës, duke kërkuar që kjo mbështetje të vazhdojë deri në përmbylljen e suksesshme të procesit.
Po ashtu, u diskutuan hapat e Kosovës drejt Bashkimit Evropian, përfshirë reformat e brendshme, përafrimin me politikat e BE-së dhe përkushtimin ndaj vlerave evropiane.
Në takim u vlerësua edhe kontributi i Sllovenisë në misionin e KFOR-it, i cili, sipas Haxhiut, mbetet i rëndësishëm për sigurinë e Kosovës dhe stabilitetin rajonal./teve1.info/
