Kryeministri i Shqipërisë, Edi Rama, deklaroi për Reuters se qeveria do të vazhdojë me projektin e resortit luksoz të lidhur me Jared Kushner, pavarësisht protestave të vazhdueshme për ndikimin e tij të mundshëm në mjedis.
Projekti prej 1.4 miliardë eurosh është planifikuar pranë zonës së mbrojtur Vjosë-Nartë, ku ambientalistët paralajmërojnë se mund të rrezikojë habitatet e flamingove, fokave dhe breshkave të detit. Flamingoja është bërë simbol i protestave kundër projektit.
Duke folur për Reuters, Rama hodhi poshtë thirrjet për anulimin e projektit dhe tha se zhvilluesit do t’i “mahnisin” njerëzit me planet e tyre. Ai shtoi se pjesë të resortit mund të hapen për publikun para fundit të dekadës.
“Po ju them, do të jetë një projekt i bukur dhe ne do ta realizojmë atë, dhe do të jemi krenarë që po kontribuojmë për Evropën,” tha Rama.
Ai shtoi: “Jam zgjedhur për t’i bërë këto gjëra të ndodhin. Nuk jam zgjedhur për t’u udhëhequr nga njerëz që kanë një ide tjetër se si duhet të zhvillohet vendi.”
Projekti mbështetet nga firma e investimeve Affinity Partners e Kushnerit dhe është pjesë e një plani më të gjerë zhvillimi që përfshin edhe ishullin e Sazanit. Sipas Ramës, vlera totale e projekteve mund të arrijë deri në 5 miliardë euro.
Lidhur me shqetësimet mjedisore, Rama i tha Reuters se vlerësimi i ndikimit në mjedis ende nuk është përfunduar dhe do të kryhet paralelisht me zhvillimet.
“Jemi shumë krenarë për atë që kemi bërë për jetën e egër në Shqipëri. Komisioni Europian nuk ka asnjë arsye të dyshojë në vullnetin tonë të palëkundur për të mbrojtur gjithçka që duhet të mbrohet kur bëhet fjalë për natyrën dhe jetën e egër,” tha ai.
Ndërkohë, mijëra protestues u mblodhën në Tiranë duke kërkuar ndalimin e projektit dhe duke shprehur pakënaqësi më të gjera ndaj qeverisë së Ramës./teve1.info/
