Një grua shtatzënë dhe dy të tjerë u vranë në sulmet ajrore ruse në rajonin verilindor të Kharkivit në Ukrainë, ndërsa dy persona u vranë në Donetsk, thanë zyrtarët ukrainas, citon Al Jazeera.
Sulmet me raketa gjatë natës në qytetin Chuhuiv plagosën gjithashtu gjashtë persona dhe shkaktuan dëme në ndërtesa banimi dhe dyqane, tha të martën zyra e prokurorit rajonal.
Në qytetin e Kharkivit, 16 persona u plagosën në një sulm me dron, përfshirë fëmijë. Fotot e shpërndara në internet nga zyrtarët tregojnë një ndërtesë që digjet dhe makina të djegura.
Dy persona u vranë në Bilozerske dhe Druzhkivka të hënën, tha në Facebook Vadym Filashkin, kreu i administratës shtetërore të Donetskut, ndërsa 11 të tjerë u plagosën në Sloviansk dhe Shabelkivka.
Sulmet vijnë pasi Ukraina intensifikoi sulmet e saj me dronë me rreze të gjatë veprimi ndaj objekteve ruse të naftës, duke shkaktuar mungesë karburanti, ndërsa Rusia kreu sulme të mëdha ajrore në vend.
