Eksperti i çështjeve politike, Ilir Kulla, ka komentuar rezultatet e zgjedhjeve të parakohshme parlamentare në Kosovë, duke vlerësuar se Lëvizja Vetëvendosje ka shënuar fitore të qartë, por jo në përmasat që kishte synuar.
Në emisionin “Matrix” në Tëvë1, të moderuar nga Mehmet Kalisi, Kulla tha se rezultati i zgjedhjeve e konfirmon VV-në si forcën kryesore politike në vend, megjithatë rënia e pjesëmarrjes në votime ka ndikuar që partia të mos arrijë objektivat e saj maksimale.
“Rezultati është i qartë. VV-ja është më shumë se dyfishi i PDK-së dhe gati trefishi i LDK-së, ndërsa disa herë më e madhe se AAK-ja. Fitorja e VV-së është e padiskutueshme, por bojkotimi i zgjedhjeve nga një pjesë e qytetarëve bëri që ajo të mos arrinte atë që pretendonte”, ka thënë Kulla.
Sipas tij, situata në Kuvendin e ardhshëm do ta detyrojë Vetëvendosjen të kërkojë bashkëpunim me partitë e tjera, veçanërisht për çështje që kërkojnë shumicë më të gjerë politike.
“VV-ja mund ta formojë qeverinë, por për çështje të rëndësishme, si zgjedhja e presidentit, do t’i duhet të ulet dhe të merret vesh me njërën nga partitë e tjera”, u shpreh ai.
Kulla tha se matematikisht opozita do të mund ta largonte Vetëvendosjen nga pushteti nëse do të bashkohej në një front të vetëm.
“Nëse PDK, LDK dhe AAK do të formonin një koalicion të përbashkët, sot Vetëvendosja do të ishte në opozitë dhe ato parti do të kishin mundësinë të qeverisnin. Megjithatë, problemi qëndron te sistemi dhe te marrëdhëniet politike mes tyre”, tha ai.
Sipas analistit, një bashkëpunim ndërmjet Vetëvendosjes dhe PDK-së do të ishte një nga opsionet më logjike pas zgjedhjeve.
“Me këtë rezultat, zoti Kurti duhet të merret vesh ose me PDK-në, sidomos duke pasur parasysh se është partia e dytë më e votuar. Një marrëveshje e tillë do të mund të siguronte edhe zgjedhjen e presidentit”, deklaroi Kulla.
Ai paralajmëroi se vazhdimi i paqartësive politike mund të ndikojë në legjitimitetin e institucioneve në të ardhmen.
“Kurti është lideri i partisë së parë, por nuk përfaqëson 100 për qind të votuesve. Për mendimin tim, ai duhet të arrijë një marrëveshje me njërën nga partitë e tjera për të garantuar stabilitet institucional dhe zgjedhjen e presidentit”, tha Kulla.
