Rezultatet preliminare të zgjedhjeve të 7 qershorit kanë sjellë ndryshime të rëndësishme në hartën politike të Kosovës, veçanërisht kur krahasohen me zgjedhjet e 28 dhjetorit 2025.
Sipas Eugen Cakollit nga Instituti Demokratik i Kosovës përtej rënies së përgjithshme të numrit të votave si pasojë e pjesëmarrjes më të ulët në votime, vërehen lëvizje domethënëse në përqindjet e mbështetjes së partive politike në nivel komunal.
Cakolli thotë se Lëvizja Vetëvendosje ka pësuar rënie në të 38 komunat e Kosovës, megjithëse vazhdon të mbetet forca e parë politike në 31 komuna, mbështetja e saj ka rënë në mënyrë të dukshme krahasuar me zgjedhjet e fundit.
Humbjet më të mëdha në përqindje janë regjistruar në Suharekë, Mamushë, Junik dhe Rahovec.
Në anën tjetër, analizon se Lidhja Demokratike e Kosovës rezulton subjekti me zgjerimin më të madh të mbështetjes territoriale. LDK ka rritur përqindjen e votave në 35 komuna, me avancimet më të mëdha në Istog, Malishevë, Junik, Suharekë dhe Rahovec.
Sipas Cakolit, Partia Demokratike e Kosovës paraqitet më stabile në raport me rivalët politikë. Sipas të dhënave, PDK ka shënuar rënie në 21 komuna dhe rritje në 16 të tjera, me ndryshime kryesisht të moderuara. Megjithatë, Malisheva veçohet si komuna ku kjo parti ka realizuar rritjen më të madhe, me rreth 22 pikë përqindje më shumë krahasuar me zgjedhjet e kaluara.
Edhe Aleanca për Ardhmërinë e Kosovës ka përmirësuar rezultatin e saj në pjesën më të madhe të vendit. AAK ka rritur përqindjen e votave në 30 komuna, ndërsa rezultatet më të mira i ka regjistruar në Suharekë, Deçan, Rahovec, Junik dhe Gjakovë.
