Komisioni Qendror i Zgjedhjeve ka njoftuar se nga 8 qershori do të nisë procesi i numërimit të votave në Qendrat Komunale të Numërimit (QKN).
Sipas planifikimit të KQZ-së, orari i fillimit të numërimit do të ndryshojë nga një komunë në tjetrën. Në disa komuna procesi do të nisë pasdite, ndërsa në komunat me numër më të vogël votuesish ekipet do të fillojnë punën që në orët e para të mëngjesit.
Kryetari i KQZ-së, Kreshnik Radoniqi, ka sqaruar se në këtë fazë do të bëhet kontrollimi dhe verifikimi i materialeve zgjedhore, si dhe numërimi i votave për kandidatët dhe subjektet politike. Ai theksoi se procesi mund të zgjasë disa ditë për shkak të vëllimit të madh të materialeve që duhet të trajtohen.
Sipas KQZ-së, rezultati zyrtar dhe përfundimtar i zgjedhjeve nuk mund të shpallet pa u përmbyllur numërimi i të gjitha kategorive të votave. Kjo përfshin votat e qytetarëve nga diaspora, votat e dërguara me postë, votat e hedhura në përfaqësitë diplomatike, votat me kusht si dhe ato të personave me nevoja të veçanta.
Radoniqi bëri të ditur se para nisjes së numërimit do të realizohet pranimi dhe verifikimi i materialeve zgjedhore nga të gjitha qendrat e votimit, me qëllim që procesi të zhvillohet në përputhje me procedurat ligjore dhe standardet e transparencës.
Përfundimi i kësaj faze dhe përfshirja e të gjitha votave të mbetura do t’i hapë rrugë shpalljes së rezultateve zyrtare të zgjedhjeve nga KQZ-ja.
