Një nga temat më të ndjeshme në procesin e dialogut Kosovë – Serbi, është çështja e shqiptarëve të zhdukur me dhunë, nga forcat serbe gjatë luftës së fundit.
Për këtë qëllim, nga pala kosovare ishte kërkuar edhe hapja e arkivave serbe.
Besohet se në arkivat e Beogradit, qëndrojnë dokumentet që kanë informacione të sakta për fatin e shqiptarëve të zhdukurit.
Tëvë1 ka siguruar një dokument, i cili është përpiluar nga serbët në kohën e luftës, e në të cilin ka informacione të sakta për disa nga të vrarët në Komunën e Fushë Kosovës, dhe për varrimin e tyre.
Kryetari i Këshillit Koordinues për të zhdukurit dhe krimet e luftës në Kosovë, Ahmet Grajqevci, thotë se informacionet në këtë dokument, kanë përkuar saktësisht me gjendjen në terren.
“Nga këtu deri atje, llogarite diku 7 metra nuk ka pas më shumë vend të hapur. Tash këta janë varrosur me ekskavator, jo dinjitetshëm… e dimë vetëm që kur kemi ardhur trupat e këtyre personave nuk i kemi gjetur, ndërsa ky dokument e plotëson atë dëshmi, atë dëshmi të asaj varreze masive që ka qenë këtu”, tha ai.
Grajqevci tutje thotë se kur kishin ardhur pas luftës në këtë vend i cili ndodhet në fshatin Lismirë të komunës së Fushë Kosovës, kishin gjetur 7 varre të hapura. Serbët pasi i kishin varrosur, i kishin zhvarrosur përsëri trupat dhe i kishin dërguar në Batajnicë, e vetëm pas luftës, ishin kthyer përsëri nga atje.
Raporti i gazetarit Valmir Gallopeni.
