Kandidati për kryeministër nga rradhët e Lëvizjes Vetëvendosje, Albin Kurti, u ka bërë thirrje qytetarëve që ende nuk kanë votuar të shfrytëzojnë të drejtën e tyre të votës para mbylljes së vendvotimeve.
Përmes një mesazhi drejtuar qytetarëve, Kurti ka theksuar se kanë mbetur më pak se tri orë deri në përfundimin e procesit të votimit, duke i ftuar të gjithë ata që nuk kanë votuar ende të dalin në qendrat e votimit.
“Kanë mbetur më pak se 3 orë kohë për të votuar. Të gjithë ju, që ende nuk keni votuar, ju lutem ta bëni një gjë të tillë. Për pak minuta vendosim për zhvillim, siguri dhe stabilitet për vendin tonë. E ju që tashmë keni votuar, ftoni miqtë, farefisin e dashamirët të shkojnë për të votuar. Sa më e gjerë vendimmarrja aq më e fortë demokracia dhe Republika jonë”, ka deklaruar Kurti.
Ai u ka kujtuar gjithashtu qytetarëve që ndodhen në komuna të tjera se mund të votojnë me kusht në komunën ku gjenden aktualisht.
“E juve që ju ka zënë puna të jeni në komuna tjera, mund të votoni me kusht në cilëndo komunë ku jeni. Secila komunë e ka një qendër të votimit bash për këtë punë. Dil dhe voto! Pak kohë ka mbetur. Mos e le për në fund”, ka përfunduar Kurti./teve1.info/
