Përmes një njoftimi Kushtetuesja ka bërë të ditur se të njëjtit nuk i kanë shteruar mjetet juridike të parapara sipas ligjeve në fuqi.
Prokurori Armend Hamiti ndonëse nuk ka pranuar të flasë para kamerave, në një përgjigje me shkrim ka thënë për televizionin se do të vendosë në vijim për hapat tutje.
Ndërsa, vendimin nuk e ka komentuar prokurori Fazliu. Televizioni gjatë së martës ka kontaktuar si me presidencën ashtu edhe me Këshillin Prokurorial për të marrë qëndrimin e tyre pas njoftimit të Kushtetueses, por as nga ata nuk ka marrë përgjigje.
E Lavdim Makshana nga Instituti i Kosovës për Drejtësi, tha se Kushtetuesja ka vendosur ndryshe nga një rast i ngjashëm për të cilin ka pranuar kërkesë më 2014.
“Atëherë Laura Pula dhe një kandidat tjetër kishte bërë kërkesë në Gjykatën Kushtetuese, por Gjykata atëherë kishte vendosur. Kurse në rastin e fundit Gjykata nuk është lëshuar fare në meritat e rastit por i ka shpallur si të papranueshme të dy kërkesat duke u arsyetuar se nuk i kanë shtjerrur mjetet juridike. Ne si IKD konsiderojmë se Gjykata Kushtetuese është dashur të lëshohet në meritat e vendosjes edhe në rastin e dy kërkesave të kandidatëve”, tha ai.
Sipas IKD-së kandidatët për kryeprokurorë mund të vazhdojnë me betejën e tyre pavarësisht vendimit të Kushtetueses.
“Sikurse z. Hamiti ashtu edhe z. Fazliu ata mund t’i drejtohen Gjykatave të shkalls së parë dhe ta shfrytëzojnë të drejtën për t’u ankuar. [3:13] Kjo nuk e pengon presidenten të vazhdojë me procedurat me dekretimin e kryeprokurorit të shtetit”, shtoi ai.
Prokurorët Armend Hamiti e Shqipdon Fazliu pretendojnë se me propozimin e Blerim Isufajt për kryeprokuror, janë shkelur të drejtat dhe liritë e tyre të garantuara me Kushtetutë. Ndaj procesit të përzgjedhjes së kryeprokurorit kanë shprehur vërejtje edhe shoqëria civile.
Raporti i gazetarit Gojart Jashari.
