Në Qendrën Korrektuese të Dubravës është parandaluar një rast i tentimit për futjen e kontrabandës brenda institucionit korrektues.
Sipas njoftimit të Shërbimit Korrektues të Kosovës, rasti ka ndodhur dje rreth orës 16:40, gjatë kontrolleve rutinore në Portën 0, kur zyrtarët korrektues, në bashkëpunim me Njësitin K9, kanë ndaluar për kontroll një kamionetë pune që po kthente të burgosurit nga puna jashtë institucionit.
Gjatë kontrollit të detajuar të automjetit, janë gjetur dy qese të kamufluara me substancë të dyshuar narkotike, të fshehura në dyshemenë e automjetit.
Sipas SHKK-së, nga rrethanat e rastit dyshohet se janë të përfshirë disa të burgosur që kanë të drejtë pune jashtë institucionit. Ndaj tyre janë marrë masa disiplinore dhe u janë ndaluar beneficionet deri në përfundimin e procedurave hetimore.
“Pas identifikimit të rastit, zyrtarët korrektues kanë ndërmarrë menjëherë veprimet e nevojshme procedurale, kanë iniciuar hetime të brendshme dhe kanë njoftuar Policinë e Kosovës, e cila po zhvillon hetimet përkatëse lidhur me këtë rast. Shërbimi Korrektues i Kosovës mbetet i përkushtuar në luftimin e dukurive të kundërligjshme dhe në garantimin e rendit, sigurisë dhe integritetit institucional në të gjitha institucionet korrektuese”, thuhet në njoftim./teve1.info/
