Sponsori i KF Shkëndijës ka reaguar ashpër ndaj vendimit të fundit të Federatës së Futbollit të Maqedonisë (FFM), duke e cilësuar atë si skandaloz dhe duke kërkuar rishqyrtimin dhe korrigjimin e menjëhershëm të tij.
Në reagimin e bërë publik, sponsori thekson se KF Shkëndija ka qenë ndër klubet e rralla që gjatë viteve ka funksionuar me seriozitet, korrektësi dhe respektim të plotë të të gjitha obligimeve sportive dhe financiare.
Sipas tyre, investimet në klub kanë kërkuar kosto të mëdha financiare, angazhim dhe sakrifica të vazhdueshme, ndërsa kontributi i Shkëndijës ka tejkaluar kufijtë e futbollit vendor.
“Shkëndija është klubi që me paraqitjet e saj dinjitoze në garat evropiane ka ndikuar drejtpërdrejt në ngritjen e koeficientit të ligës, nga i cili përfitojnë të gjitha klubet vendore. Falë këtij kontributi, nga viti i ardhshëm futbolli ynë do të ketë një vend shtesë në kupat evropiane”, thuhet në reagim.
Sponsori vlerëson se është e papranueshme që një klub me një kontribut të tillë të dëmtohet përmes vendimeve administrative, të cilat sipas tyre cenojnë një projekt serioz dhe afatgjatë.
Në të njëjtën kohë, është paralajmëruar edhe mundësia e tërheqjes nga mbështetja e klubit dhe nga futbolli në Maqedoninë e Veriut, nëse FFM nuk e rishikon vendimin e marrë.
“Ky qëndrim na detyron të shqyrtojmë edhe opsionin e tërheqjes nga klubi dhe nga futbolli në Maqedoninë e Veriut. Nëse FFM nuk e tërheq këtë vendim, ne si sponsor do ta shqyrtojmë seriozisht vazhdimin e mëtutjeshëm, pasi ky vendim cenon të drejtat dhe politikat e klubit”, theksohet në reagim.
